Nana Comini Uri Illafue
Naga nairai Naciones Unidas railla rafuemo danomo duide. Per iemo duide. Naga nairaimona damie jaide. Rafuena siadollena, danomo oficabidimaci. 10 de diciembre de 1948 bie rabemo ita rafuena llotimaci. Nana ie rafuena nana comini uiollena jitaidimaci. Ie jira Per ie gobierno bie rafuena birui cuetatate. 
Nano llogafue
Biena uio: Nana comini jiaie comini anamo iellena, ie finua diese nagamie feiollena, nana comini uri illena, bie rafuena lloticai. Comena nagamie jeicia jira, bie rafuena lloticai. Nana cominimo bie rafue daje isoi duide. 
Biena uio: Ailluena comini, diga icaio jiaie cominimona duere sefuilla jira, nana comini jaciruieno iacana jira, naga comini rana iacana jira, bie rafuena lloticai. Duere sefui raillano, nana comini nie isoide rafuena jaciruieno llollena, bie rafuena lloticai. Duere sefui raillano, nana comini nie isoide rafuena jaciruieno llollena, bie rafuena lloticai. 
Biena uio: Naga gobierno ie cominina canua, naimacimo bie isoide rafue illena. Gobierno diga, jobaime naimaci finoellena, bie isoide rafue ie cominimo illena, naga gobierno ie cominina canua. 
Biena uio: Naga nairai jiaie nairai diga, nabairillana caijitailla jira, bie rafuena lloticai. 
Biena uio: Naga Naciones Unidamo duide nairai bie rafuedo jaiacana jira, bie rafuena lloticai. Nagamie comena jeiciga. Iima rio baifemo faiede. Rio iima baifemo faiede. Comini duere itinona jitaiedicai, iadedi naimaci uri caimare illana jitaidicai. 
Biena uio: -Danomo bie rafue llocana jaiticai - nana Naciones Unidamo duide nairai llotimaci. 
Biena uio: Bie rafuena nana comini raise atona uiuana jitaidicai. Iena nana comini uiuamona, bie rafue suicana jaite. 
Danomo ofillanona bie rafuena lloticai 
Nana comini bie rafue anamo jitaidicai. Naga nairai bie rafuena iiuana jitaidicai. Bie rafuena naimaci cominina llofuiana jitaidicai. Naga nairai bie rafue lloga uai finuana jitaidicai, nana naimaci comini bie rafuena ollena. Ie jira bie rafuena lloticai. 
Rafue 1.
Nana cai comuillamona dama cai abido iticai. Cai comuillamona jiaimie anamo iedicai. Nana daje facaiconi iticai. Abi uiuanona comuidicai. Dani coninirie cai nabairilla. 
Rafue 2.
Nana cominimo bie rafue duide. Naga nairaimo bie rafue duide: naga riomo, naga iimamo, Jusiamuina sedadimiemo, Jusiamuina sedaedimiemo, jamai bue isoidimiemo, jamai bue isoiedimiemo, dueredimiemo, ucuberedimiemo, riai uaina aitimiemo, jiaie uaina aitimiemo, diese itinomo bie rafue duide. Nie isoide gobierno anamo naimaci ia, bie rafue nana naimacimo duide. 
Rafue 3.
Nana comini illana jitaidicai. Jiaie comini anamo bu jacaienia, jiaime anamo budi naimie anamo oreena. Nana comini jiaie cominina jaciruienana jitaidicai. 
Rafue 4.
Jiaie comemo maijillena jaca budi cominina ebe isoi fecaena. Iena caidica. 
Rafue 5.
Cominina isi cacaitaena. Duere sefuiellena, cominina janafefitaena. 
Rafue 6.
Naga gobierno railla: -Nana cai eniruemo itinodi cominidimaci. Ie jira daje isoi nagamiiaina canoiticai -railla. 
Rafue 7.
Nana comini gobierno lloga uai anamo daje isoi itimaci. Nana cominimo gobierno lloga uai daje isoi duide. Bie rafuedo jaiedimiemona jaca buna duere sefuiena. 
Rafue 8.
Gobierno lloga uaido jaiedimiemona bu duere sefuia, naiena raise siadollena, juez dine naimie jaillana buna rairuiena. 
Rafue 9.
Illaicominidi jamai ebena buna gaitaena. Calabozomo, crcelmo jamai ebena buna uiega. Ie nairai motomona budi jamai ebena dotaega. 
Rafue 10.
Bumo llogidua rafue ia, naie rafue duiena juez dine naimiena uille, naie rafue raise siadollena. Bainino iene finoena. 
Rafue 11.
1. Bumo llogidua rafue ia, naie rafuena nia siadoenia, naimiena nia duere finoena. Juez dine naie rafuena bainino siadoena. Naimie dibeimo itinona naimiena riidollena rairuiena. 
2. Navui ie finoca nia rairuiega rafue facaina birui naimiena duere finoena. Rairuica rafue bu finoia, ie finoca facaise duere sefuillacino baifemo naimie duere sefuiena.
Rafue 12.
Nagamie jofomo uri illa. Ie illa comini diga icirafuena finoena. Bu naimiena uri itataenia, naimie jitaia, ie uri itataedimiena naimie llogidoia, iena illaicomini rairuiena. Bu naimie jeare aia, naimie jitaia, naimie jeare aitimiena naimie llogidoia, iena illaicomini rairuiena. 
Rafue 13.
1. Ie nairaimo nine bu macariacania, illaicomini naimiena rairuiena. Ie nairaimo nine ie jofo illana bu jitaia, illaicomini naimiena rairuiena. 
2. Jiaie nairaimo bu macariacania, illaicomini naimiena rairuiena. Abido ie nairaimo naimie biacania, illaicomini naimiena rairuiena. Illaicomini naimiena caidiena.
Rafue 14.
1. Duere sefuillamona jiaie nairaimo nainomo duere sefuiellena bu jaiacania, illaicomini naimiena rairuiena. 
2. Maraiedicino finoenia, naimie jaillana illaicominidi rairuiena.
Rafue 15.
1. Naga gobierno railla: -Nana cai eniruemo itinodi cai comini. Cai nairaimo duudimaci -railla. 
2. Gobierno ie cominina oni dotaena, jiaie gobierno naimacina feioiacaienia. Cai nairaimo duiedio -illaicomini buna iese lloena. Jiaie nairai imiena bu jaiacania, illaicomini iena rairuiena.
Rafue 16.
1. Ie aina illena, nie eimie riona oiacania, iena buna rairuiena. Nie isoide riona ollena buna rairuiena. Ie ini illena, nie rio eiaio iimana oiacania, iena buna rairuiena. Nie isoide iimana ollena buna rairuiena. Ua mei, uruiaina iaimaiai comuitajana buna rairuiena. 
2. Aina ollena, inina ollena, conimana jitaillanona iite. 
3. Naga iima ie ai diga ia, naga rio ie ini diga ia, ie nairai judaisieite, iadedi naga iima ie aiede rio diga icabia, ie nairaidi judairite. Naimaci comini uri illena, naimaci nairaiai judaisiellena, naga gobierno ie cominina canua.
Rafue 17.
1. Eniruena bu namataacania, jofona bu namataacania, rana bu namataacania, illaicomini naimiena rairuiena. Naga come iena namataacania, jiaie comini diga iena namataacania, illaicomini naimiena rairuiena. 
2. Bumona ie eniruena, bumona ie jofona, bumona ie rana jamai ebena bairoena.
Rafue 18.
Bue isoide ramo ie comecina facaia, buna naimiena rairuiena. Jusiamuina bu sedaacania, buna naimiena rairuiena. Nie isoidimiena bu sedaacania, buna naimiena rairuiena. Jiaie raiuedo bu jaiacania, buna naimie rairuiena. Jiaie cominimo naimie iinuacino lluana buna rairuiena. Ie joiomo iena lloia, jino iena lloia, naimiena buna rairuiena. 
Rafue 19.
Nie isoide ramo ie comeci facaia, naimiena buna rairuiena. Naimie comeci facajacino muidona, naimie duere sefuiena. Jiaie nairaimona bue isoide comecina facajacinona naimie feioiacania, jiaie nairaimo bue isoide comeci facajacinona naimie oretaiacania, iena illaicomini rairuiena. 
Rafue 20.
1. Jamai nie isoide rafue finollena comini ofitaia, naimacina buna rairuiena. Nie isoide rafuemo bu duicania, iena buna rairuiena. 
2. Nie isoide rafuemo bu duiacaienia. Iemo naimie duiena buna rairuiena.
Rafue 21.
1. Naimie jitaia, danomo ofillano, nagamie ie illaicomini nie isoi ie nairai sedajacinodi siadoga. Naimie atona siadoiacaienia, naimie facaina jiaimiedi iena siadolle. Ie illaicominir rafuena bu siadoiacania, naimiena buna rairuiena. 
2. Illaicominina bu jaiacania, iena buna rairuiena. 
3. Comini jitailla diese illaicominidi nana cominina sedaja. Dajerie illaicominina jaillena, comini dinena naimacina fetua. Nana comini uainino naimacina fetua. Naie illaicomini meidollirui jiai lloga.
Rafue 22.
Seguro social railla rafuemo nana comini jainaiaina. Naie rafuemona ie gobierno ucube illa diese nagamie feiua. Naimie buena jitai raillano, naimie comena jira, naimie uri illena, iese nagamie feiua. 
Rafue 23.
1. Nie isoide rana bu maijiacania, naimiena buna rairuiena. Mare ra illanomo naimie maijia. 
2. Maijille jaca illena, gobierno canua. 
3. Jiaimie iemaijiamona ibana feioia, naimie isoi bu maijiia, ie maijiamona ibana raise feiua. 
4. Naimie comena jira, ie comini buena jitai raillano, ibana naimie raise feiua. Raise feioenia, gobierno naimiena canua.
Rafue 24.
Maijia fuilla mei, bu jafuier oiacania, naimiena buna rairuiena: Cominina are maijitaena, iadedi naimci maijiacana dinori maijia. Fiesta raillaruimo naimaci maijitaena, iadedi nairui facaina ibaca. 
Rafue 25.
1. Ie comini buena jitai raillano, ie maijimona nagamie ibana feiua. Ie comini raise guillena, iniroi illena, jofo raise illena, remedio ollena, ie diese ibana feiua. Bu maijinia, bu duia, bu feciona ia, bu uaicimana jaia, ie ucube bumo ienia, gobierno naimiena canua. 
2. Rio jocua facaise gobierno naiaiona canua. Gobierno naga uriaina daje isoi canua. Moorede uruena canua. Naiso moto oga urue daje isoi canua.
Rafue 26.
1. Nana uruiat escuelamo jaillana buna rairuiena. Nano jailla aos facaina ibataena. Escuelamo nana uruiatjailla. Primaria fuillanona jinie escuelamo bu jaiacania, iena illaicomini t rairuiena. Rabena uiotino diese nainomo feioga. 
2. Escuelamo naga rafuena raise finuana profesor llofuega. Naga urue comena jira, iese llofuega. 
3. Nana conina nabairillana llofuega.
Rafue 27.
1. Nie isoide rafue ie nairai finoia, nagamie nainomo jaillana illaicomini rairuiena. Naie rafue ite ie comeci jaisillena jira, iena rairuiena. 
2. Nie isoide rana bu cueia, naiemona dama naimie ibana feiuana buna rairuiena.
Rafue 28.
Bie rabemo cuega rafue suillena buna rairuiena. Nana comini bie isoide suille rafue illanomo jainaiaina. 
Rafue 29.
1. Dani coniniri ie illanomo nagamie dajena maijia, nagamie comena jira. 
2. Ie gobierno lloga uai diese nagamie ie jitaillacinona finua. Jiaie cominino ie comecina facajano iena finua. Nana comini uri illana iena finua. 
3. Uri illena Naciones Unidas lloga uaina buna jeare uacaiena.
Rafue 30.
Bie rafuedo jaiacadinona buna rairuiena. Bie rafue uiuamona, bie rabemo lloga rafuena buna jamaiena.
